लोकनीती न्युज नेटवर्क
शिवणे : शारीरिक तंदुरुस्ती आणि आत्मविश्वास यांच्या जोरावर कोणतीही शारीरिक मर्यादा ओलांडता येऊ शकते, हे पुण्यातील उत्तमनगर परिसरातील प्रविण दहिफळे यांनी सिद्ध करून दाखवले आहे. मधुमेह (शुगर) आणि उच्च रक्तदाब (बीपी) या आजारांवर विजय मिळवत त्यांनी सिंहगड १०० वेळा सर करण्याचा अपूर्व विक्रम प्रस्थापित केला आहे. त्यांच्या या प्रेरणादायी प्रवासातून तरुणांना आरोग्याचा मूलमंत्र मिळत आहे.प्रविण दहिफळे हे एक सर्वसामान्य युवक, मात्र त्यांनी आपल्या जिद्दीच्या जोरावर असामान्य कामगिरी केली आहे. अनेकांना शुगर आणि बीपीच्या त्रासामुळे व्यायामापासून दूर राहावे लागते, मात्र प्रविण यांनी त्याला हरवून नवे उदाहरण निर्माण केले आहे. नियमित व्यायाम, योग्य आहार आणि सकारात्मक मानसिकता यांच्या जोरावर त्यांनी ही मोठी उपलब्धी मिळवली आहे. सिंहगड हा पुण्याचा ऐतिहासिक किल्ला असून, त्याचा ट्रेक अत्यंत आव्हानात्मक मानला जातो. अशा परिस्थितीत तब्बल १०० वेळा हा किल्ला सर करणे ही सोपी गोष्ट नाही. प्रविण यांनी हे साध्य करून अनेकांना फिटनेससाठी प्रेरित केले आहे.
त्यांच्या या प्रवासामुळे आज अनेक तरुण आरोग्याकडे अधिक लक्ष देऊ लागले आहेत.“शुगर आणि बीपी हे फक्त आजार नाहीत, तर चुकीच्या जीवनशैलीचा परिणाम आहेत. योग्य आहार, नियमित व्यायाम आणि मानसिक शिस्त यामुळे त्यावर मात करता येते,” असे प्रविण दहिफळे म्हणाले. त्यांच्या या जिद्दीला अनेकांकडून कौतुकाचा वर्षाव होत आहे.प्रविण यांची ही कामगिरी तरुणांसाठी नवा दिशादर्शक ठरत असून, त्यांनी दिलेला आरोग्याचा मूलमंत्र प्रत्येकाने आत्मसात करण्याची गरज आहे. प्रविण दहिफळे यांनी १००व्यांदा सिंहगड किल्ला सर करण्याचा अत्यंत प्रेरणादायी आणि अभिमानास्पद पराक्रम गाठला आहे. या उल्लेखनीय यशाबद्दल त्यांचा मित्रमंडळींनी सत्कार करून त्यांच्या मेहनतीला आणि जिद्दीला सलाम केला.
